早前美股升咗一輪但上唔到9000點後，好似又開始番返去跌浪，企業業績較預期差，加埋其他壞消息充斥市場，杜指單單喺上星期五就跌咗超過兩個巴仙，成個形態非常嚇人。
上個禮拜花旗嗰邊好多公仔佬（按：圖表派）話美股重未跌完，跟住重有分析員話要減持股份㖭。伏勝其實好同意美股未跌完嘅論說，但係就相信即使啲人無晒錢炒股票，都要飲水食飯同瞓覺，所以各位戰友唔買銀行同地產股無乜所謂，但唔買食品股就有啲可惜。
就好似啱啱公布咗上半年業績嘅康師傅（322）咁，上半年業績非常之有睇頭，就算啲大藍籌同股仔嘅盈利跌到七彩，佢唔單止營業額上升，純利重升夠五成三，唔使好似好多美國大型連鎖百貨咁，要用減價嚟谷起營業額，但係又無乜錢賺。聽班專做芬佬盤嘅朋友講，話隻股好合班芬佬嘅胃口，起碼可以炒番上去3蚊樓上，如果有興趣不妨上車先，但係就話到明唔會咁快就到位，話晒都係基金盤嘛。
𠵱家買股票除咗要揀啲唔好同美國市場拉上關係嘅股票之外，最重要重係要有祖國嘅支持，就好似前一排公布會發行新股買合營公司喺上海浦東高科技園笪地嘅川河（281）咁，話說新入股佔已發行股本三成八嘅股東，幕後老闆傳聞係上海市政府。點解上海市政府對呢隻股仔咁有興趣，重注咗個又靚又正嘅項目入去？原來係有段古嘅，聽聞話上海市政府唔想再將啲太過高風險嘅項目放入去𠵱家個窗口度，但又想向市場集資，惟有另外再起多一個爐灶嚟專搞高科，而川河又同佢哋合作開，所以順理成章做埋「親家」。
伏勝