由仁濟主辦嘅「海外學生仁濟慈善餐舞會」，前晚喺君悅舉行，除咗一班高官名人之外，重請嚟一班環球唱片嘅歌手張燊悅、黃伊汶同余文樂等唱歌助興，結果成功籌得二百幾萬善款㖭。
前晚去呢個ball嘅嘉賓，好多都係一pairpair拍住拖咁嚟嘅，好似首次一齊公開亮相嘅楊婉儀同男友王瑞勳咁。王瑞勳來頭都唔小，佢係練馬師王登平個仔，之前重同陳雅倫拍過拖㖭！前晚楊婉儀同王瑞勳重表現得好鬼親密，王瑞勳成日攬住楊婉儀條腰，喺場內又成日喁喁細語咁。楊婉儀大讚呢個男友夠細心之餘，重話彼此最啱key嘅係大家都鍾意動物，得閒可以一齊去放狗。
問楊婉儀識咗呢個男友後，會唔會多咗入馬場，佢笑笑口咁話：「以前入親馬場都係做司儀，𠵱家有機會咪入囉，都唔會刻意嘅。」再問佢今次同個名人拍拖，壓力大唔大？楊婉儀就笑住咁話：「我唔覺得佢係名人，淨係知佢叫Simon（王之洋名）啫。」
劉德華喺十三年前參加宣明會助養兒童計劃，先後助養超過四十名兒童，日前華仔助養嘅其中一個印尼女子、現年二十二歲嘅妮露，應邀到台灣電視節目《超級星期天》，妮露更公開多謝華仔多年嚟助養佢，令佢可以完成讀書嘅心願，華仔聽到妮露嘅心聲，表現得好感動。
關之琳日前去咗大馬宣傳電影《絕世好B》，佢話自己雖然好鍾意小朋友，不過佢都堅決唔會生BB，因為覺得生兒育女責任好大。佢用普通話講：「如果我有小孩，他一定會被我寵壞，可能到時我辛苦，他也辛苦，所以我沒打算要生小孩。」唔知佢男友黃家諾贊唔贊成呢？
孫燕姿噚晚喺大馬舉行巡迴個唱，佢前日喺大馬舉行記者會，有傳個唱嘅票房唔係咁好，原因係佢啲歌迷年紀細，無能力買飛入場。孫燕姿前日就回應：「我當然希望多些人來看，沒有人也還是要唱吧！」佢重話要擺脫佢「不動如山」嘅稱號，所以會喺演唱會跳多啲舞。
唐麗球個姨甥女、應屆候選港姐w;嘉碧儀認真犀利，由初賽到𠵱家已經連奪四個獎項。
噚日唐麗球喺中環慶祝老友嘅新餐廳開張時，唐麗球話：「我有教佢用平常心去面對之後嘅決賽，佢𠵱家壓力愈嚟愈大，我叫佢唔好當係一個比賽，先可以發揮到自己。」
楊紫瓊同男友鍾再思、徒弟張卓楠、導演鮑德熹前晚喺上海一晚趕兩場，出席電影《天脈傳奇》嘅首映禮，何超瓊都有出席捧場。早排鍾再思個女盛裝出席香港嘅首映禮，同楊紫瓊有傾有講，鍾再思前晚同記者講話楊紫瓊為人隨和，個女性格亦好好，所以佢哋好夾得嚟喎！