稅務局兩位前任局長近日突然曝光，繼前任署理局長單羅玉蓮因收大筆退休金再度見報後，久未露面嘅前任局長黃河生，噚日喺東涌靈糧堂怡文中學校董會接收校舍儀式上出現。
原來佢係嗰間中學嘅校董之一，佢幾年前俾《蘋果》揭發佢老婆開辦報稅公司而冇申報，搞到局長都冇得做，噚日佢對八方話𠵱家日日都睇《蘋果》，並無因而罷買。
噚日校董會接收學校後擺咗兩圍淮揚菜請客，原來所有菜式名稱都係黃河生改嘅，佢都用咗好多時間同心思，好似「河上鮮勁生」呢味，其實係「香脆鳳尾蝦」，又河又生當然係借自己嗰名；「鴻圖一條龍」（大紅西瓜）就係指該校係一條龍學校；而其他菜式都係以校監、校董或校長名字命名。
成個菜譜名稱都有啲時事意味，好似嗰味「問責磨合期」，就好直接指問責制；至於「長科來賀慶」，估計係指剛上市嘅長江生命科技。相信唔少人最想食，係嗰碟叫「股市齊興旺」嘅花牛𦟌，你話係咪？
傳真︰2623-9278
電郵︰