蘇永康前日就搖頭丸案主動申請觀察勒戒後即被送往戒毒所戒毒，許志安昨日力撐好友康仔非常勇敢，並對他作出的決定引以為榮，楊千嬅及鄭中基則不約而同稱讚康仔是真男人。
無綫製作的節目《姿采繽紛樟木頭》，昨日邀請了許志安（安仔）參與演出，這個節目將送出總值約一百六十萬的洋房。
安仔好友蘇永康（康仔）前日就搖頭丸一案，到台灣應訊並主動申請觀察勒戒，結果被法院判定他服食二級毒品罪成，即時被送往戒毒，為期十四日至一個月。
對於好友勇敢面對的行為，安仔引以為榮，他說：「之前幾日同康仔食飯，佢都已經諗定會點，其實有幾壞啫？不過件事都完結咗。我覺得我有個咁有勇氣嘅朋友，幾好。人生當中，係要有一個好好嘅試煉同經歷，反而係咁我重愛多咗呢個朋友，重引以為榮。」
安仔續說：「我哋識咗十幾年，好似兄弟咁，𠵱家告一段落。大家唔好以為好大件事，只係一件極小嘅事，我入醫院就快死都冇人知啦！」安仔表示不會到台灣探康仔，但康仔返港時，他定會約對方食飯。
而楊千嬅昨日在尖沙嘴出席宣傳活動，她認為康仔是真正男人，千嬅說：「我好尊重呢個人（指蘇永康），因為佢最成功係坦白面對自己，好勇敢，更加值得我尊重，第時出番嚟都係一條好漢，咁先係真正嘅男人。希望大家都會支持佢，亦希望佢喺嗰段時間可以堅強啲，第時有更好嘅人生。」
無獨有偶，千嬅前男友鄭中基亦指康仔是個真男人，他與盧巧音昨日在電視城錄影《一觸即發》，鄭中基說：「我信佢冇做過，佢個樣又唔似。願意承擔，係男人嚟，佢又唔係坐監，係入戒毒所，台灣係唔係都要入（戒毒所）㗎！入去十幾日係規矩，佢根本唔係有毒癮，好快會出嚟！」
至於梅艷芳則表示康仔很勇敢，她昨日到跑馬地一中醫館剪綵時說：「康仔好勇敢，負責任。件事可以完全結束，觀眾應該用平常心對佢，原諒佢，佢對樂壇都有貢獻，工作盡責，我自己都犯過錯啦，過後咪自己警惕囉！」
此外，王晶昨日出席奧海城一個宣傳活動時，被問到安雅將赴台接受審訊，有可能被判入戒毒所一事時，他說：「國父孫中山以前都俾人拉過，一樣可以平反。」