十多年前，馬榮成遇襲受傷，更差點斷手毀掉創作生涯，成為當年轟動一時的大新聞。但不久他便成立「天下出版社」，憑《風雲》奠定香港漫畫界王者級地位。但未來公司的重點計劃，竟然不是漫畫本身，而是向其他媒體進軍，包括動畫和電影。
「除咗會繼續推出周邊產品外，我哋以後嘅重點都會放喺動畫之上！今年漫畫節『天下』已放映部份片段，現場反應相當好，亦已有電影公司主動同我接洽；出《風雲》動畫已是事在必行。」
今年漫畫節，馬仔似乎比往年更勤於現身，除了搞《風雲》動畫外，還與名導演張藝謀合作，搞漫畫電影《英雄》。馬榮成從畫二十六年，成名作《中華英雄》膾炙人口，陪伴大部份連環圖迷成長，其後「天下」旗下也曾出版《英雄會》、《英雄無淚》等作品。連搞電影都以「英雄」為題，是否對「英雄」兩字念念不忘：「其實真係有份情意結喺度嘅！」馬仔承認道。
「人真係長大啦！聶風同步驚雲亦會隨着我嘅心態轉變而成長，佢哋武功高強，但內斂，表面看似不問世事，但又心如明鏡，洞悉世情。今日呢兩個角色喺故事裏出場嘅機會唔多，但性格卻比以前更鮮明。」馬仔隨着年紀漸大，更喜歡那些隱世高人，在提及其所創作的眾多漫畫人物，如華英雄、聶風、步驚雲等，他最想成為哪一個時，出乎意料之外竟是「無名」！無名是《風雲》中一個地位超然的絕世高手，亦是步驚雲師傅，「手中無劍，心中有劍」，境界出神入聖。現實中除了劉德華希望擔當此角，開拍相同題材電影外，原來馬榮成亦很投入這個人物，更計劃明年推出《再見無名》漫畫。「無名係我最想做嘅人物，佢係嗰啲唔好理我咁多嘢，與世無爭就最好嘅人！」
說話斯文淡定的馬榮成，跟其所創作那些激戰連場的漫畫似乎是兩個世界，但能夠十年如一日每個星期都出版漫畫，並搞其他周邊產品，沒有一些信念和毅力，是不能成功的，好像今屆漫畫節，有報道指入場人數與銷售情況都跟隨大市下跌，但馬榮成卻不以為然：「我哋第一日已經做咗百幾萬生意，之後營業額都日日上升，同過往幾年比較，其實冇乜升跌，我諗只要有誠意、肯創新，同保持到好品質，就自然會有應得嘅回報。」
記者：羅穎聰