三菱代理最近推出三部配用Turbo偈嘅RV，明顯要Sell高性能形象，不期然令人想起GalantVR-M；而響二手市場最搶手嘅三菱車款，亦正好係GalantVR-M。
最早落地嘅GalantVR-M係1997年車，當年新車價為$259,000，當時銷情甚佳，而目前二手市場放盤甚多，惟並未影響承接力，皆因2.0公升MIVEC引擎，足有200匹馬力輸出，又配有+/-半自動波、皮椅、恒溫冷氣、四個安全氣袋同15吋合金胎軨，因而極受用家歡迎。現時1997年車成交價約$65,000，屬近年抗跌能力最強嘅三菱車款。
唔講唔知，原來GalantVR-M嘅200匹引擎係香港獨有，日本主力賣1.8公升GDI型號，三菱喺2001年已不再造2.0MIVEC偈；因此最後一批GalantVR-M喺2001年初落地，之後嘅Galant就係配用GDI引擎嘅VR-G型號。GalantVR-M嘅新車價喺四年內變化維持在兩成內；而1997年8月前落地嘅GalantVR-M係無天窗配置，另外代理則於1997年8月加添電天窗、真皮桃木軚環等配備，車價曾高見$269,000。
目前放盤最多嘅GalantVR-M都係1997年車，年份愈新愈少二手放盤，貨源與當年新車銷量成正比，企理嘅1997年叫價約6萬5千，1998年叫價約8萬以上，1999年約10萬，2000年則約12萬或以上；但選購時仍有一啲要注意嘅地方，就係由於此車屬200匹快車，部份用家會為其作大量改裝，尤其係原裝避震Setting以舒適為主，唔少車主都會改硬避震去提升劈彎能力，如長時間操勞過度，車架、轉向及車廂裝飾可能有較多雜音，而改裝死氣喉亦屬普遍，買家喺選擇時須衡量合法與否。
論劈彎能力，原裝GalantVR-M其實較本田AccordSiR略遜，推頭情況較為嚴重；因此，有意外嘅GalantVR-M多數都係撞頭，如二手叫價偏低，而引擎艙內又有新噴油痕迹，就要小心衡量是否由意外造成，事關買二手車始終係買狀態，便宜莫貪。