鄭秀文（Sammi）對於自己的愛情一直都避而不談，每次當記者提起其好朋友許志安的名字，她只會以笑回應。原來，Sammi於小時候與一般少女無異，她亦曾幻想將來結婚時，舉行西式party。她亦謂自己是個沒計劃的人，一切順其自然。
樂壇天后鄭秀文（Sammi）與許志安（安仔）雖然早已被認定為一對，不過雙方從來未正式承認過二人的關係。
Sammi近年的事業如日方中，大部份時間亦專注在事業上，但女人少不免都會憧憬婚姻生活，問Sammi何時才會與安仔拉埋天窗，她即哈哈大笑並撒嬌說：「乜你問埋啲咁嘅問題，我真係唔識得點樣答你。事實上我係一個冇計劃嘅人，唔知點解出面啲人都覺得我好有計劃，其實我係唔會成日諗下一步應該點樣做。不過我細個時都有諗過將來結婚要搞一個西式嘅party，但係就冇期望過婚後嘅生活會係點。」
Sammi雖然將大部份時間放於工作，但家庭對她亦十分重要。早前，Sammi的父親因中風入院，她每天都盡量抽時間到醫院探父親。Sammi說：「其實屋企人喺我心目中真係好重要，我同屋企人嘅感情好好。我會成日同我家姐交流扮靚心得，佢又會同我講吓湊仔經，而我同細佬都會成日傾偈。
「至於我爸爸就好鍾意聽我講工作上面嘅嘢，佢都知道我做嘢做得好辛苦，不過佢經常都會鼓勵我要畀心機去做。有一樣嘢我係由入行至今仍然堅持嘅，就係每逢所有大節日，都一定要返屋企同家人食飯。」
近年Sammi在電影方面的成就十分出色，由她擔任女主角的電影，如《孤男寡女》及《瘦身男女》等，票房亦非常理想，故有不少報道指她的片酬高達五百五十萬。Sammi對此說：「我冇特別去分析自己做成點，我覺得觀眾鍾意就得。至於片酬方面，雖然𠵱家個大氣候唔係咁好，不過我成日都話當有一日遇到一個好嘅劇本，我可以唔收錢都得。至於同過咁多個導演合作，我覺得同杜琪峰合作得好愉快，不過我都好希望可以同陳可辛、張艾嘉同埋張婉婷合作。」
Sammi近年所接拍的電影都以喜劇為主，但她沒有打算改變戲路，Sammi說：「我都話自己真係一個冇計劃嘅人，所以我都唔會刻意去諗行乜嘢路線，做嘢最緊要係夠自然，咁就會有最好嘅效果。好似喺《我左眼見到鬼》入面，可以發現到我嘅演技係同以前唔同。不過由𠵱家開始，我都會去揀劇本，始終我都唔想太過重複之前做過嘅嘢。」
相信每一個藝人於工作失意時又或受連串是非困擾時，都會有退出娛樂圈的念頭，但Sammi表示自己入行多年從沒有此想法，她說：「我冇諗過邊年邊日要退出，但係總會有呢一日，不過我手頭上重有好多合約，所以都唔會係咁快嘅事。最重要嘅係呢一刻我覺得最開心、最輕鬆，因為我嘅經理人、助手同埋一班工作人員都好幫得我手，變咗好多嘢都唔使我去兼顧，事業亦可以話上晒軌道。」
Sammi亦直言自己也經歷過不如意的日子，她說：「咁多年我都已經習慣咗，我都唔會太過在意，我認為最開心係可以自自在在。做咗咁多年，唔開心就一定會有，不過好多時發𤷪𤺧都係因為唔夠瞓。」
另一方面，Sammi近年亦多得廣告商垂青，事業更上一層樓，化妝品牌SK-II也找她任代言人。談到美容護膚，她自有一套心得。Sammi笑言：「其實我唔會去做facial，最多都只係敷吓面膜，要皮膚靚就要喺落妝時落得乾淨。我份人都唔信嗰啲食療法，我乜都食㗎，飲多啲水同瞓得夠就係最有用嘅方法。」
Sammi說：「我上台表演比較鍾意化濃少少嘅妝，好似紅色唇膏同青檸色眼影，我覺得咁樣影得我好精神，隻眼又會好亮晶晶。無論喺台上表演又好，抑或拍廣告都好，我覺得最緊要表現到自己有自信，加上保持笑容，咁就會畀人睇到最靚嘅一面。好似近來我拍咗一個唇膏廣告，我都冇刻意諗去點做，自自然然就得。雖然連續拍咗四日，但係拍出嚟個效果好靚，我都覺得好開心。」
撰文：李珮洳
攝影：陳偉權
化妝：Zing
髮型：BillyChoiofHairCulture
場地提供：香港洲際酒店