費倫天拿散班，球員全部獲准自由轉會，其中隊長迪里維奧亦有唔少球會吼佢，不過佢就話見到費倫天拿搞成咁，加上意大利國家隊又喺世界盃咁早出局，心都淡埋，重話想「掛靴」㖭！
我求大俠唔知迪里維奧係一時意氣講誨氣說話，抑或真係諗住退休，如果佢真係唔踢，就實在可惜。因為佢雖然成三十六歲，但喺上季所見，佢每場都博盡，做足職業球員應有嘅本份，咁有誠意嘅球員𠵱家真係買少見少。天無絕人之路，好球員冇理由冇人吼嘅。
NBA火箭主將法蘭西斯上季因為偏頭痛，訪尋名醫都唔知乜病，𠵱家終於證實係內耳不平衡。我求大俠真係𢱑晒頭，如果畀我哋中國人醫，就唔使搞咁耐啦，因為偏頭痛同頭暈都係內耳不平衡好普通嘅病徵，真係懷疑啲西方醫學點先進。
多蒙特喺球壇嘅成就雖然唔及拜仁，不過就俾對方有生意頭腦。德甲聯喺中國都幾受歡迎，所以多蒙特亦特登喺佢哋個官方網頁，增設中文簡體字版本，以便打入中國人嘅市場。咁樣睇嚟，做嘢慢半拍（官方網頁英文版更新唔夠快兼冇中文版）嘅拜仁，真係要同多蒙特學吓嘢。
愛華頓日前已經公布咗球員嘅球衣號碼，據國內傳媒報道，兩名國足李鐵（12號）同埋李瑋峰（21號）都對自己嘅號碼唔多滿意，唔係嫌冧巴大就係嫌冧巴細。我求大俠真係好想知道研究係「雙李」特別麻煩，抑或係國內傳媒塑造到佢哋成為麻煩友？
衞冕英超冠軍阿仙奴今屆人腳鬼咁鼎盛，所以成日傳想賣走陣中嘅尼日利亞前鋒簡奴。不過，由於市道唔好，據英國傳媒透露，「兵工廠」不過將簡奴標價一百萬鎊（約一千二百萬港元），但都無人問津。簡奴話晒都係國腳，亦攞過唔少獎，咁低價都賣唔出又真係樣衰啲。