教育統籌局局長李國章今個星期四正式返新工，中大好頭好尾，七月三十日出版嘅《中大通訊》大讚李國章任內有六大功績，分別係學術、研究、國際關係、行政、推廣資訊科技及「其他主要成就」。通訊中重有李國章《致中大全體師生的公開信》，解釋點解會跳槽。
中大細數Arthur（李國章洋名）六大方面二十幾項成就，不過國際關係方面嘅成就，文中所指多數係有關內地嘅活動，例如「中大生率先往內地實習」、「內地生率先入讀中大」等。香港同內地明明係一國，稱作「國際」，唔通想李國章學台灣嘅李登輝？
重有一個「其他主要成就」，大家可能覺得有啲抽象。但其中一項係最實際不過：「各方捐贈激增」。《中大通訊》詳細列出Arthur在任七年來，各方捐款累積至十四億四千六百萬，平均每年超過二億！佢上任前，中大每年平均只有八、九千萬捐款。原來佢仍在醫學院時，已經為中大籌得五千幾萬。世家出身嘅Arthur真係可以點石成金，唔知做咗教統局局長會唔會同樣為政府撲到水呢？
Arthur在自己嘅公開信中承認，「礙於新任命的種種程序問題，未能盡早將政府任命通知校方及中大師生，令大家產生不必要嘅憂慮，為交接問題製造額外困難。」佢又話自己好唔捨得中大，希望明年四十年校慶可以參與盛會，八方但願佢果陣唔會喊啦。
傳真︰2623-9278
電郵︰