玩開日本玩具，都知Medicom名字響噹噹，隨便數代表作，從前就有12吋Figure矢吹丈、怪醫秦博士、幪面超人，近兩年就以細細粒的KUBRICK風魔萬千少男，自去年9月睇中女生「逢熊必搶」的習性，推出熊仔頭積木系列BE@RBRICK，其可愛模樣果然迷暈一眾女生，而限量、Crossover的噱頭花招也鎖住一眾潮流友，成為近一年來炒價最癲、「最潮」的玩物。
最近香港FONCA公司取得Medicom本地代理權，今勻漫畫節更請得其社長赤司來港見記者，力谷BE@RBRICK，同場曝光有抽獎用的會場特別版「龍」BE@RBRICK，相信又會炒到飛起。
記者：何兆彬 攝影：陳盛臣
特別為今屆漫畫節製作的「龍」字BE@RBRICK，除肚上印有「龍」字其實無甚特別，就咁未上色印個字，但可以肯定係逢會場特別版（兼非賣品）一定有價。「龍」字BE@RBRICK每日分3次抽獎送出（先到FONCA攤位填表格），想得到？重有今日可以去碰運氣。
Medicom玩具香港一直買得到，今勻Medicom首次在香港覓得代理，有乜優點呢？「香港與日本有很多相似的地方，文化也比較相近，我覺得這個市場很有趣，發展潛力也大。有代理商固然可以比較有商品保證，亦可監察翻版的情形。」據赤司透露，日本玩具業的營業額相當驚人，單以01年Medicom計，全年生意額就有20億日圓，比起00年增長了30%，而今年目前過了一半，大概亦有15%的增長。
全球經濟下滑，間間公司都話盈利警報，Medicom何解可以獨善其身呢？「我們不只是間生產玩具的公司，我們也是間Planning公司，不斷有計劃與不同的公司合作，例如我們會與電影公司合作，8月推出有《天使愛美麗》Kubrick。」
今次來港，赤司話見過兩個香港Artist──MichaelLau、EricSo，「佢哋係我喺香港最早認識的Artist，今次見面係因為大家將會有合作。」原來Medicom與MichaelLau、阿庭（LMF）、何家超將推出Artist版BE@RBRICK，於8月9日開始的香港Toycon玩具展推出。
睇中香港Artist合作本來值得香港人驕傲，惟同時香港海賊版（翻版）一樣咁出名（臭名遠播）。「我亦聽講過BE@RBRICK喺香港有翻版，呢個情形我哋好關注。」赤司先生可知道就在場內都有售翻版BE@RBRICK？會否透過會場投訴？「暫時不會投訴，一切會交予律師處理。」不過最後赤司透露，再下一輯BE@RBRICKSeries5會有最新防盜版設計，但由於在試驗階段，詳情暫時就未能透露喇。
Series1一套$15,000
第一套BE@RBRICK去年9月推出，共20隻，香港一出賣$3,000，之後價錢不斷上升，𠵱家日本價15萬日圓，而香港就賣$15,000左右。全套20隻最搶手係圖中4隻Artist版，即係由其他Artist設計的版本，其中以左二名為BadLuck最矜貴，一隻市價就要港幣$3,900。
香港之恥
漫畫節人家請來日本Medicom社長，你就喺場內賣$10一隻假BE@RBRICK，認真無恥兼丟架。講嘅係太源街某惡名昭彰的玩具舖。