樂壇新人余文樂噚日喺灣仔會展出席漫畫節嘅簽名會，佢重趁機宣傳有份主演嘅台灣劇集《愛情白皮書》VCD，同埋由佢設計嘅一隻狗公仔。余文樂重好有耐性咁同現場約三百名歌迷簽名。
余文樂嘅歌迷以女仔居多，不過佢哋都唔算瘋狂，表現得好文靜，所以現場秩序都幾好。余文樂噚日話：「平時啲fans見到我都唔係咁，可能今日（即噚日）有記者喺度，佢哋怕記者影相啩，所以比較怕醜。」
另外，有雜誌報道指余文樂不滿環球唱片力捧同係新人嘅中建電訊主席麥紹棠個仔麥浚龍，余文樂一度拍枱大鬧唱片公司高層。余文樂話：「我哋係同公司新人，都唔會計較，而且大家外形都唔同，佢識跳舞，總之各有優點。」余文樂話遲出碟係因為佢趕唔切錄歌，同其他人無關。
李菁有份投資嘅美容纖體中心分店噚日開幕，亞視賽馬女主持朱恩珊亦有出席。
身為剪綵嘉賓嘅李菁，竟然遲大到，趕唔切喺吉時前剪綵。李菁一嚟到就唔好意思咁話：「對唔住！」佢重講笑叫佢嘅合夥人唔好扣佢嘅股份，李菁最後亦自爆係因為貪靚先搞到遲到。
羅文嘅助手阿東噚日同人呻話啲人成日亂咁傳羅文嘅死訊，佢話羅文其實中氣十足，鬧人都不知幾大聲，而且羅文都叫啲人唔好諗住打擊佢嘅士氣。不過羅文就謝絕各方好友嘅探訪，因為唔想啲人又亂傳，不過肥姐就成日都有電話畀佢，總之大家都希望羅文早日康復啦！
黃夏蕙噚日開記者會，話因為佢同向華榮打官司，對方要上訴，黃夏蕙搵咗班老友幫佢唱兩場粵曲，籌錢幫佢打官司，重話其中一場祥嫂都會出席。夏蕙姨噚日戴住口水肩，攞住個大奶樽，瞓喺張枱度話要重生，真係服咗佢。
蕭正楠噚日喺美孚嘅盈科體育館主持排球賽開球禮，佢話𠵱家忙緊拍新劇，預備喺呢個月中出新碟時製成VCD附送畀fans。問到蕭正楠近日受公司力捧有冇壓力，蕭正楠就話：「壓力就唔算太大，最重要係做好自己，不過公司投資咁大，都要做好啲。」此外，問蕭正楠喺新劇有冇親熱鏡頭？佢話：「劇情就未定，不過若果導演話要，我都會獻出我嘅銀幕初吻。」