英格蘭中場肥仔嘜加斯居尼早輪到咗美國同美國大聯盟球隊華盛頓DC試腳，見佢收晒身咁嘅款，我求大俠重以為佢一定得，會喺花旗國展開佢事業新嘅一頁。點知突然傳出佢同DC嘅合約談判破裂，唔會為佢哋比賽。
究竟三十五歲嘅加斯居尼點解加盟唔成，版本有好多個；有啲話因為DC方面對佢嘅表現唔係百分百滿意，有啲就話因為DC出手太低，加斯居尼唔制。我求大俠就相信後者啲，因為足球喺美國唔係太流行，大聯盟球星人工得好少，最受歡迎嘅美國國腳當奴雲嘅年薪都係得十萬美金（約七十八萬港元），咁又點啱加斯居尼嘅胃口呢？
祖雲達斯中場戴維斯一直想投羅馬，或者因為遲遲未成事，搞到佢不知幾煩燥，終於喺早兩日三角賽同AC米蘭嘅干查埋牙。據聞祖記教練納比表明唔再重用佢，而唔知係咪因為呢次打交事件，搞到羅馬會長辛斯都話暫時唔想要戴維斯。呢位荷蘭佬今次都算衰衝動，兩頭唔到岸囉。
巴西中場祖連奴第三度加盟英超米杜士堡遇到阻滯，英國勞工部話祖連奴呢兩年代表國家A隊唔夠七十五巴仙，唔發工作證畀佢；但米杜士堡最後上訴成功。其實，祖連奴喺之前兩次加盟米杜士堡效力時，亦遇到呢個情況，我求大俠真係唔明點解次次都係咁？
拜仁假假地都係大球會，不過佢哋辦事效率似乎唔高。贊卡過檔烏甸尼斯成個禮拜有多，喺佢哋官方網頁德文版嘅球員名單上，亦已早作更新；但係喺英文版，唔知點解重有呢位德國前鋒個名喺度。咁樣真係好誤導視聽，所以我求大俠亦希望佢哋盡早更新啦。