嘩！唔係呀嘛！部本田Accord2.3四門房車由原來嘅$198,000，減4萬9千元賣$149,000，而2.3天窗版就由原來嘅$218,000減4萬9千元，賣$169,000；咩話，連部頂級嘅3.0V6天窗版，都由原來嘅$269,000減到$229,000？係真唔係呀？無錯，今勻珍珠都無咁真，連亞Mark未趕及同廣大車迷披露之前，代理方面經已正式向外公布，兼且限售80部現貨，售完即止，相信不出數日定必被搶購一空啦！唔知本田代理今次嘅行動，會否為一眾同級對手帶來不少壓力呢？睇嚟日前有傳話近期日圓飆升，因而令一眾日本車有加價嘅可能，睇嚟又不盡正確噃！
至於另一邊廂嘅萬事得，原來佢哋早前經已秘密運嚟全新3.0公升嘅MPV，意圖響高級MPV市場上分一杯羹；呢部新近抵港嘅MPV3.0型號，不僅有全車包圍裝飾，另外重有電鍍門邊鏡連指揮燈、前置霧燈、16吋合金軨、雙趟門連電索掣、全車高級真皮座椅同埋桃木裝飾等等，而車價都不過係$289,800，要較本田Odyssey頂級嘅3.0型號，便宜近3萬蚊之外，相比起代理嘅豐田Previa2.4型號，售價更屬同級㖭。精明嘅你若然正想選購一部行政轎車，又或者係豪華MPV的話，你又會點揀呢？