細價股除牌事件，釀成政治風波，曹仁超講到「殺牠死」乘機清理門戶咁款，都幾得人驚。鄺其志固然成為眾矢之的，某些消息人士驚死記者唔明，特登吹風，講到明港交所係由證監會監管嘅，三層監管制唔會改變，佢哋有甚麼弦外之音，唔使畫出腸喇啩？
於是吹風後翌日，證監會啲負面消息出籠，證監會主席沈聯濤被指包庇親信避稅，證監會資訊總監薛正剛原來自九八年開始，以「顧問公司形式」出糧，唔係用私人身份支薪。呢啲事已經發生咗四年幾，點解以前冇人揭發，以示自己夠「公義」，要到現在先至有人發匿名信呢？唔通寫信人最近至知情？
記得美國FBI曾經有過一位胡佛局長，執大權凡四十年，美國嘅野史故事話，每有新總統上台，胡佛就會好恭敬咁親自送上一份厚厚嘅「快樂」副本，對總統講：「調查局關於總統閣下嘅檔案，我已經親身處理，親自鎖在特別密室，唔畀人睇，請總統放心。呢一份係畀總統過目、珍藏嘅。」總統聽完，當然知道係乜嘢一回事，一定咪咪嘴笑住講：「局長操勞為國，眾所周知，還請以國家為重，不可輕言退休。」
胡佛令頭頂上司司法部部長、總統對他敬畏三分，其他啲內閣部長自然唔敢講佢半句，偶爾有啲人唔順超，佢嘅file資料會唔會漏出街，見仁見智矣。