最近又紋身。是一隻Ladybird，在左膊，拇指指甲般大小；丁屎咁細都用了七隻顏色，三對腳重要清晰可見，逼真程度達一百巴仙。說它是藝術品亦絕不為過。紋身師Gabe，聽說他是全港最了得的；我信，事關那三對腳，幼如髮，少啲功力都手震。Gabe也是畫家，要甚麼他就畫甚麼，手起筆落，以為用咗copybook。
帶我去紋身的人，是當時的男朋友；「最近」就已成「當時」了，真兒戲。「……等我畀（錢）啦！你話過最唔鍾意收禮物，因為怕keep……我終於可以送一樣嘢畀你係forever，但又唔使keep……」刻下他說。呢頭留又呢頭走，真食屎。
而第一次紋身是在澳洲，九五年，那是一朵花，在屁股，肉酸到不得了，但好討我歡心，因為無乜紋身會咁醜怪，所以硬是惹人憐愛。當時的男朋友為此幾反感，望都唔想望，其後分開了因為他媾過第二件了，一趟回澳，找他取回甚麼的，他向我拉高衫袖，原來他也紋了身，在手腕上少少那兒，而圖案，竟是我朵屎忽花……！呢頭走又呢頭留，他都食屎。
好享受紋身的過程。入肉的感覺，獨一無二。只嫌過程太短，和不夠痛。到人老珠黃一定紋勻全身，豁出去，入肉過夠。Gabe你等我。（編按：李響續稿未到，暫停一天。）