美國連日公布嘅經濟數據相當差，美股周四晚終於頂唔順，杜指跌2.6%，納指跌3.6%。港股周四已經腳軟軟，美股回頭令恒指噚日借勢再跌188點，收9991，但一周計數，恒指仍升219點，升幅2.2%。
港股本周初一度出現曙光，可惜周四及周五連續下跌，技術走勢又再度轉弱。恒指噚日完全補回周二上升裂口9983-10151，而周三9RSI曾升破中期下降軌（5月延伸至今），而噚日亦跌回其下，反映好大機會係假突破，亦即表示恒指短期亦無望升破中期降軌阻力（現處10318）。
前日提到滙豐（005）似無力再上，噚日果然見滙豐跌幅擴大，收85.25元，連周一嘅上升裂口85元至85.50元亦補回，反映走勢好大機會逆轉，下試近期低位84元。不過，噚日滙豐Put輪9234最後冇升跌，與正股走勢唔配合。
從表面睇，主要係溢價偏高，所以出現「縮水」現象，因此正股跌而沽輪唔升。不過，由另一角度睇，今次滙豐中期業績真係唔易睇，而且過往滙豐公布業績後多數有反彈，所以正股形勢雖偏淡，但博滙豐Put輪其實風險唔細，睇市跌可能買恒指Put輪較穩陣。
美股周四雖回吐，但杜指技術未轉壞，點都要睇埋美股周五走勢，至決定下周策略。
趙飛雲