收到幾位讀者來信，問的都是同一問題：買入一些末日Call輪後，相關正股股價上升，但輪價卻不升反跌，原因何在？
解答呢個問題，要先從窩輪嘅價格同價值講起。簡單化嚟講，窩輪價格由兩部份組成，一是內在價值，二係時間值。舉個例說，假設滙豐（005）現價90元，某隻滙豐Call輪之行使價80元，由於行使價低於正股現價，呢隻係價內輪，有內在價值。假設此輪兌換比率為0.1（10份輪兌1股正股），此輪嘅內在值為：（90元－80元）×0.1，即是1元。
不過，呢隻滙豐輪嘅輪價唔係1元，而係1.5元。點解會賣貴0.5元？原因係隻輪重有半年期，半年內正股升上95元或以上嘅機會存在，故此呢段時間應有價值，而那0.5元可視為時間值，亦是溢價。
但時間值會隨着時間消逝，尤其是剩番一兩個月命時，時間值會消失得好快，到屆滿日時會完全冇晒，即係溢價變零。中移動（941）周四升0.1元，但其Call輪9194反跌12%，皆因隻輪得番1個月命，其時間值開始加速消耗。
章 盛