小初噚日提過耀生行（290）股價不能大跌，否則牽連甚廣，噚日隻股就表演咗一次笨豬跳之後嚟個大反彈。
隻股噚日一度急跌4成，最低見4.85元，但晏晝就拗腰抽返上去，收8.20元，只係微跌1.2%，而成交股數就只得1球貨咁大把。
經紀陳話，雖然耀生行話就話貨源集中在幾個人手上，但係炒咗咁耐，唔多唔少都有人買咗多少，呢次證監講到明話徹查交易，唔驚就有鬼，所以有人沽番出嚟好正常。
經紀陳又話，基於隻股仍然位高勢危，所以無論腰力點勁都好，散戶千祈咪亂掂。
最近有隻平日冇咩點郁嘅新世紀集團（234）竟然在淡市之中起飛，唔夠1個月時間，股價由30仙升上最高51仙，噚日收48.5仙，但成交就一向唔大。經紀陳話聽唔到隻股有動作，但就估計係有大戶做咗孖展，所以炒高幾格保險啲。
慕容小初