今屆女排大獎賽決賽有好多唔同贊助商幫手，其中一個雪糕贊助商就喺記者室門外擺咗個雪櫃，放咗唔少雪糕同雪條畀各傳媒享用。噚日德國隊頭場輕取巴西，班德國姑娘返更衣室時途經記者室，可能口淡淡，見門外有免費雪條，差不多個個都攞條嚟食，一啲都唔執輸。
講開贊助商，贊助中國女排嘅體育品贊助美津濃，噚日特別提醒現場球迷，完場唔好走得咁快，因為有中國女排嘅親筆簽名波衫，不過，啲波衫並唔係免費派發，而係每件一百大元，唔知熱情中國女排球迷會唔會幫襯呢？
賽會為咗加強賽事現場氣氛，就特登招募咗一班打開排球嘅學生每日到球場做啦啦隊，而獲邀做啦啦隊嘅學生，除咗可以免費睇波外，大會更加會撥出一筆錢畀佢哋，等佢哋買整齊制服，又或者設計橫額等，幫各隊打氣，大會認真諗得周到。