本來阿虎都唔想再講除牌風波事件，但唔講都要講，事關阿虎唔知財政司司長又要浪費幾多公帑嚟調查事件真相。其實真相已經好明顯，就係港交所（388）用錯字眼，令傳媒將「強制合併股份機制」寫成為「除牌機制」，嚇親股民及莊家，導致股災，跟住有股民食咗鹹魚唔抵得渴抗議，嚇到問責官員變成卸責官員，在立法會上演一場政治騷，結果卸責官員成為眾矢之的，演變成一場政治鬥爭，睇住政府班官內哄，槍嘴指錯隔鄰，令唔少莊家偷笑。
ｅ莉莎提過大家要注意康師傅（322），噚日宣布中期賺5120萬美元，增長153％，都算不負所望，但冇派息就比較令人失望。噚日大市跌188點，但康師傅股價冇起跌，企硬喺2.30元收市，或多或少反映業績理想因素，不過有貨都係時候趁好消息回吐。
聯大集團（346）噚日宣布控制性股權易手，涉資5666萬元，但最值得注意係買家竟然係只有28歲嘅國內民企董事總經理周益明，阿虎絕非年齡歧視，但相信好多人都好有興趣想知佢啲錢點樣嚟，係咪老竇大把水？阿虎向好多人打聽呢位年輕才俊嘅背景，但個個都話唔知。
科達集團（673）最近配股集資1750萬元，但似乎話重未夠。Cookie話，公司正部署大舉集資或發新股進行收購，甚至藉此變相賣殼，公司亦公布將法定股本由7500萬元增至15億元。不過，科達洽購南韓網上賭博公司一事已經告終，家陣重未知有咩好嘢值得收購。
阿 虎