Bandai一向坐擁高達嘅遊戲版權，之前同Capcom合作出隻街機Game《聯邦VS自護DX》大受歡迎，連帶新版《DX》都由街機旺到家用機。今次Bandai飛起Capcom，以自己廠牌推出新一集高達遊戲《機動戰士GUNDAM戰記》，雖然遊戲玩法同操作都大同小異，不過以三人小隊形式作戰及加入超過三十款機體，令高達Fans再一次乖乖畀錢。
記者、攝影：徐影龍
鳴謝：DreamStore（東方188）
若只以加入新機體為賣點，好難吸引Fans以外嘅人去玩，所以《機動戰士GUNDAM戰記》有別於《聯邦VS自護DX》嘅二對二打法，改為三人為一小組進攻，而且設有隊長及左、右翼位置，隊長更有權改變陣式及指揮隊員，唔再係一味自顧自衝鋒陷陣，靈活調配才是致勝之道，令遊戲玩法變化更大。
遊戲主要模式分為聯邦及自護兩大陣營，各有三十關唔同任務要完成，雙打方面則豐富不少，包括二人對戰、二人對電腦等，最正係連雙打都設有任務模式，若嫌電腦操控嘅隊員AI太差，不妨相約高手朋友，一同享受二人攻陷敵陣嘅快感。唯一可惜係呢隻Game唔對應i.LINK連線對戰，期望往後推出新版時可一嘗六人大對決嘅滋味。
大作似乎特別喜歡推出限定版本，今次《機動戰士GUNDAM戰記》都唔例外，限定版除咗一隻遊戲光碟外，額外附有一本28頁全彩色官方指南，入面有大量連邦及自護軍嘅機體同人物介紹，及一個類似DVD精裝版嘅硬皮紙盒，再加一件印着「AreYouNewType?」（你是否新類型人？）T-Shrit㖭，靚唔靚真係見仁見智，不過呢兩樣嘢對Fans嚟講都頗吸引，幸好今次有大量行貨返，先可以穩住個賣價，唔係高達迷又要忍痛捱貴嘢。
故事時空發生喺一年戰爭後，今次任務中兩軍故事為重新編寫，以外傳形式登場，在聯邦及自護中的三十關Mission模式中會交代故事情節，而出場機體亦比《聯邦VS自護DX》更為壯觀，由《高達0079》至到《高達0083》機體都有機會登場，兩軍機體總數將會超過三十部，當中較特別包括戰慄之藍版本吉姆、GP01、NT-1、京寶梵、熱帶型大魔、依夫利多改及比NT-1更強勁嘅高達六號機等，相當之吸引。當然遊戲一開始唔會有齊咁多機畀你用，玩家需要逐步完成各項任務，及因應完成度及成績等級等要素，方可獲得新機體，要儲齊唔係咁易。
雖然係新作品，不過《機動戰士GUNDAM戰記》在畫面及動作表現上可謂跟前作《聯邦VS自護DX》差不多，加上操控兩者分別亦不大，故此可看成《聯邦VS自護DX》續編都得。在操作上同樣以射擊及格鬥作攻擊模式，雖然看似簡單，不過實際在戰場殺敵時好易手忙腳亂，需要靈活走位配合，至於連續技依然健在，以普通攻擊配合HeavyAttack及超必殺技SnakeAttack，對敵人造成極大傷害。新手玩家不妨先睇晒Menu入面嘅教學示範，玩起嚟易上手好多。
既然《機動戰士GUNDAM戰記》同《聯邦VS自護DX》咁似，難免機迷會互相比較一番，在網上亦曾出現激烈討論，各有各支持者，不過總括嚟講，《聯邦VS自護DX》較有格鬥感覺，亦即Capcom一貫風格，而《機動戰士GUNDAM戰記》則較着重戰略性，呢點就係BANDAI特色，兩款Game同樣出色，冇乜好爭。
對應機種：PS2
開發商：BANDAI
遊戲類型：射擊＋動作
遊玩人數：1至2人
售價：$376（普通版）?$550（限定版）