周末去超市入貨，當然係愈平愈好，所以小記當然不敢怠慢，今次就帶大家睇吓今個星期惠康嘅特價貨品，發現好多貨品都有多買多送優惠，大家不妨可以一次買定多少少。另外，尚有合時嘅夏天水果介紹畀大家消消暑，分分鐘平過果檔。而另有一些同樣減價減得較多嘅貨品同樣可以考慮。
記者：謝翠玲
攝影：伍慶泉Model:JessiefromImagine
夏日水果
呢輪到石榴同番石榴當造，喺街市同超市都開始見到有番石榴賣。可能因為啱啱當造，仍然未係好普遍，所以大大個嘅番石榴都賣得頗貴，要成差不多十八蚊左右先有一個。不過咁啱做緊特價，賣$9個又不妨買嚟試吓，睇吓今年嘅番石榴水準如何。
原價：$17.9/個特價：$9/個
水蜜桃喺呢個時間特別當造，無論係中國定係外國出品嘅，都一樣非常之多。而事實上水蜜桃又確係幾吸引。粉粉嘅外皮，而果肉則質感柔軟，重夠晒香甜。中國出產嘅水蜜桃果皮更薄，果肉更軟，而且平咗成四蚊個，不妨試試。
原價：$6.9/個特價：$2.9/個
一般家庭平日常買嘅都係美國橙，今次就趁做緊特價，介紹大家試吓南非橙。南非橙果皮唔太厚，體型同外表都同平日買到嘅美國橙差唔多，原價要成四蚊個都有啲貴，不過𠵱家只係賣$2.2，可以買幾個試吓啱唔啱口味，再決定以後好唔好轉食南非橙。
原價：$3.9/個
特價：$2.2/個
瓜類嘅水果喺夏天幾時都咁受歡迎，呢輪西瓜固然平咗好多，其他瓜類亦都賣得好平。好似今次要介紹嘅蜜瓜，食落夠晒香甜，同西瓜嘅爽甜可謂各有千秋，而大大個嘅蜜瓜唔使二十蚊，又點可以錯過。
原價：$24.9/個特價：$19.9/個
抵買精選貨品
每支平$8.9
蠔油呢類調味品係家庭必備品，但要買品質好啲嘅蠔油都唔平，所以有時最好留意有無特價，可以買定多幾支放喺廚櫃。好似今次調味品老字號李錦記嘅舊裝蠔油500毫升裝就正做緊特價，平咗成$8.9支，幾抵買。
原價：$38.8/支
特價：$29.9/支
泰國香米飯味同口感跟香港人嘅口味一向都好配合，所以一向都好多人買。今次金暹泰國香米十公斤裝正在做特價，價錢比平日平咗十九蚊。因為是十公斤大包裝，最啱屋企人多，食米又快嘅家庭入貨。
原價：$79.9/包
特價：$60.9/包
平日特價嘅多數都係花生油，不過今次終於輪到粟米油做特價。今次特價嘅係美國銷量好好嘅萬歲粟米油，呢隻粟米油標明不含BHA/BHT防腐劑，食落當然更安心。而今次特價嘅係3.785公升嘅大樽裝，一樽都有排食。
原價：$66.9/樽特價：$55.8/樽
有時肚餓都唔想落街開餐，呢個時候最方便嘅當然係廚房之寶杯麵啦。公仔杯麵三種口味沙嗲牛肉，海鮮同上素都做緊特價，入定貨，以備不時之需。
原價：$5.2/杯特價：$3.9/杯
特價貨品有着數
加一蚊多一盒
小朋友放暑假，當然要預備定啲食物畀佢哋做早餐同下午茶，唔係吓吓出街食都幾大開支。今次三合一阿華田正做緊特價，以原價加多一蚊就可以買到兩盒。而每盒三合一裝本身也多送兩包沖包同膠製小冰粒一盒，認真抵買。
原價：$26.5/盒
特價：$27.5/2盒
加送五百毫升
道地蜂蜜綠茶一向都好受歡迎，細支500毫升裝通常都要$7左右。而𠵱家買大支裝反而更加抵，因為加大咗容量，1500毫升嘅綠茶變成2000毫升，但售價就無變。
售價：$16.9/樽(加送500毫升)
在家中要做個簡單又有營養的早餐，莫過於牛奶加麥片這個組合。美祿嘅營養片同雀巢保鮮裝牛奶𠵱家就組合成一個營養早餐套裝。一套有一盒一公斤保鮮裝牛奶，加一盒美祿出品的營養片，好像可可脆波、星星米等選擇，加埋只係$19.9，平日分開買要成差不多三十蚊㗎！
售價：$19.9/套
天氣炎熱，食番一兩支雪條就最清爽，咁多雪條之中，鳳仙算係其中比較花巧嘅一種。以前鳳仙得一種芒果味道，𠵱家就多咗奇異果味，以奇異果雪糕加埋芒果肉，食落酸酸甜甜。𠵱家兩種味道嘅鳳仙都做緊特價，三條賣十一蚊，平均每支比原價買平咗$1.6。
原價：$5.3/條
特價：$11/3條