郭羨妮覺得養狗要講緣份，她養了三隻愛犬Lucky、BB和妹妹。Lucky和妹妹是從街撿回家養的，而BB則是由寵物店老闆娘送贈的。
郭羨妮家中養了三隻寶貝狗Lucky、BB和妹妹，除了BB外，其他兩隻都是從街上拾回來的。郭羨妮日前接受新一期《犬月刊》訪問時，表示早前拍電影《絕世好B》時，獲寵物店老闆娘送贈小狗，她說：「我喺旺角拍戲，埋位前去咗寵物店睇吓，見到有一竇狗BB好得意，好似北極熊仔。」
郭羨妮續說：「寵物店老闆娘話係佢自己繁殖嘅混種狗，佢見我鍾意，就送咗其中一隻畀我，當時我屋企已經養咗Lucky同妹妹，佢哋都係媽咪湊開，我當時都擔心媽咪唔准我再養多隻狗。不過我同BB返到屋企，媽咪見到BB，就猛話好得意，咁BB就成為最新嘅成員嘞。」
Lucky則是郭羨妮家中年紀最大的狗成員，她說：「Lucky係混種貴婦狗，佢曾經係流浪狗。喺加拿大嗰陣，我個朋友去街，Lucky係咁跟住我朋友，又冇人認領，所以我朋友攞咗佢返屋企養，後來佢知道我鍾意狗，就送咗Lucky畀我。我養咗Lucky五、六年，我估佢𠵱家應該有八歲。」
而郭羨妮另一隻愛犬妹妹，則是郭羨妮撿回家養的，她說：「我去東龍島拍無綫劇集《尋秦記》，落船之後重要行上山，當時妹妹一直跟住我哋，佢好乖，重識得畀手，我見佢咁就帶咗佢返屋企。」