由中大校長轉任教育統籌局局長，究竟李國章會唔會偏心，特別眷顧中大呢？噚日李國章第一日正式任局長，即時受到考驗，因為中大工商管理學院啱啱被評為亞太區最佳商學院。李國章出席有關活動時，八方問佢第一日做局長就幫中大「做騷」，驚唔驚被人話偏心？李局長就一口回答：「我只係代政府嚟恭喜中大，我對各院校一視同仁。」
跟佢一齊由中大過檔嘅新聞秘書鄧美嫻（May）亦係第一日做公務員。由於老闆無變到，八二年開始為李國章工作嘅鄧小姐話感覺分別唔大，不過叫慣「李校長」，一時改唔到口叫「李局長」。
李局長至今仍未搵到樓搬，重住喺校長宿舍。八方重知道佢呢排好頭痛，因為雖然未被迫遷，但日日由沙田去到中環返工真係好不便，希望搵個近政府總部嘅港島區樓盤。李國章噚日又話好唔捨得中大，連舊Office嘅筆同沙發都搬埋去新辦公室，「唔好嘥」咁話。
（圖）李國章首日履新，何解表情好似小學生返學咁興奮？
傳真︰2623-9278
電郵︰