張達明、梁漢文、齊芷瑤、蔡安蕎同亞視「夏日陽光美少女」候選者之一嘅甄曦，最近拍咗一套新片《夏日冬蔭功》。眾演員早排去咗泰國拍外景，重因利乘便玩咗好多水上活動，好似水上電單車同沙灘排球。
《夏日冬蔭功》劇情講述張達明同梁漢文因為被一間公司裁員，於是相約去泰國旅行散心，其間遇到齊芷瑤同甄曦，故事就係圍繞呢班年輕人嘅感情關係。
只見梁漢文依偎喺甄曦嘅膊頭上，佢唔知係咪情傾對方至走火入魔，挨住時竟然流鼻血，認真誇張。
尹光噚日喺電視城參加遊戲節目《一觸即發》，佢老婆同囝囝都有到場，尹光話：「之前問過監製話可以父債子還，咪叫個仔嚟代我跌落個窿囉！」而《一觸即發》已經鐵定加長十集，到時可能會組織一啲父子檔或母女檔嚟參加，等多啲人可以嚟玩。
樋口明日嘉噚日去尖沙嘴出席電影《玉女亞拉丁》嘅開鏡儀式，佢話為咗遲啲返日本出一隻唱片，近來學緊跳舞。樋口明日嘉早排去咗台灣拍一個杯麵廣告，重遇到地震，好彩冇受傷，佢重話拍廣告時NG咗好多次，臨走前個廣告商重送咗一大盒杯麵畀佢。
第一代「啤妹」、名模蔣怡之前以六位數字酬勞，接拍美國地捫西梅廣告。蔣怡形象一向以性感見稱，佢同周星馳拍生力清啤廣告時，就令人留下深刻印象，但佢今次接拍嘅美國地捫西梅廣告，就以健康嘅形象取勝。
拍攝當日，蔣怡以三點式泳衣上陣，配合產品嘅健康形象。而廣告商今次亦大灑過百萬嘅宣傳費，進行大型推廣活動，喺下個禮拜三會正式開始宣傳。
蒙嘉慧噚日喺無綫電視城出席《八月星辰》活動，蒙嘉慧話：「生日願望係身體健康，同埋搵多啲錢，前晚已經有fans送咗個生日蛋糕去電視城畀我，不過咁啱我唔喺廠，所以已經被人瓜分晒，總之好多謝嗰位fans啦。」
鄭秀文喺噚日播出嘅商台節目《茶煲裏的查篤撑》度話：「我諗藝人係我人生一個階段，而我嘅目標係去到三十歲打後，可以淡化，但咁唔代表退休。其實幾年前我已經計劃緊，不過冇一個落實嘅時間。」淡出後，鄭秀文希望去學畫畫，佢覺得畫畫可以減輕壓力。
早前曾經同中文版《閣樓》雜誌拍過性感照片嘅女星李璐，估唔到都有啲藝術細胞。李璐趁得閒，最近就幫灣仔一間名為TheGroovyMule嘅酒吧畫外牆驢仔公仔標誌，而酒吧裏面嘅顏色佢都有份配搭。雖然係客串性質，但都畫得維肖維妙。
目前喺醫院留醫嘅羅文，噚日凌晨一度有傳佢嘅病情有變，籮記助手阿東噚日朝早約十時到醫院時話：「前晚點幾鐘有記者call我，問我呢件事，我覺得講出嚟嘅人好唔負責任，一個人好好哋，成日都講成咁，我唔係嬲，我只覺得天有眼，小心啲，惟恐天下不亂。」