今時今日搞餐廳，菜式唔單止要色、香、味、創意俱全，重要有番咁上下「營」，先至可以突圍而出，得以立足。好似一向主攻無國界菜式的MyPlace，大廚就最拿手利用材料本身的天然味道，加大膽的配搭，做出各款健康Fusion菜，菜式一切崇尚自然，啱晒要「營」又為食的你！
記者：黃婉冰 攝影：陳偉強
ImageGirl：Kimmy
MyPlace夏日有營新菜式
＊番茄雞肉沙律$70
焗肉鬆春卷配紅酒燴梨汁$70
＊煙三文魚卷配鮮雜菌$150
焗肉桂蘋果卷配鮮雜果$60
蘆薈沙律配乳酪汁$90
大蝦配香草茄子沙律$85
燴牛仔膝配雜菜南瓜薯茸（包頭盤、甜品）$238
＊推介菜式
別以為未食主菜已送上生果盤，其實這款是大廚選用當造靚果同蘆薈做的沙律，火龍果、芒果、士多啤梨全是夏日果皇，而新鮮蘆薈則有美顏作用，先出水飛走苦澀味，用蜜糖撈一撈，為蘆薈加上天然甜味，食時再淋上特製乳酪，加入鮮果肉，令本身較寡的原味乳酪帶有清新果香，Fit到漏。
試味報告：蘆薈清甜，少少煙韌，少少爽口，乳酪汁除本身的酸味中帶有香甜果味，同新鮮生果夠晒登對，如果想嗒到蘆薈的清香甜潤，唔蘸乳酪就最好。
三層高的意式層層叠沙律，以去皮澳洲番茄加煙雞肉沙律砌成，澳洲茄以肉爽脆、核亦少見稱，而雞肉就來自煙熏過的法國春雞，大廚話貪佢肉嫩兼帶有煙熏香，配以火龍果，加入適量沙律醬調味重未夠，最後補少許自己調校過的意大利黑醋沙律汁，雙味齊下，令沙律變得不再平凡。
試味報告：煙雞肉熏過後依然嫩滑，少少鹹，配合沙律醬的香滑，愈食愈惹味，食吓食吓又會有果肉的爽脆口感跑出來，蘸少少醋汁，雙重味道，再配合番茄肉，倍添清爽。
大廚Ricky：「番茄、煙雞肉、意大利黑醋汁呢三種配搭較為新鮮同獨特，煙雞肉同火龍果味道好夾，令雞肉味好突出，醋汁又可以令沙律食落感覺無咁膩，好適合夏天！」
蘋果批好味，但外層牛油酥皮咁肥，食唔過，咁傳統法式肉桂蘋果卷又點睇？用肉桂粉加糖煮過的蘋果肉連同提子乾，被Filo紙重重包圍，焗好後伴上呍呢拿汁同草莓汁，兩種汁一香一酸，悉隨尊便！
試味報告：焗過的肉桂陣陣飄香，味道同蘋果批差不多，只是外層沒有酥皮的酥香，變成鬆化的薄層，若怕肉桂味過重，可以用香濃呍呢拿汁擋駕。
煙三文魚比新鮮三文魚多了一份「熏」香，少了一份油膩，所以被選中用來做餡，連同菠菜一齊用Filo紙捲起再焗，以蒜茸爆香的新鮮秀珍菇做伴菜，配上用新鮮雜菌打茸加忌廉煮成的忌廉汁，菇味更濃。
試味報告：煙三文魚卷只是輕輕焗過，三文魚依然嫩滑，有菠菜點綴，味道不會單調，最特別的還是雜菌忌廉汁，強勁菌香夠滑溜，愛菌者會很易接受。
食牛膝同煮牛膝同樣有學問，食就最好食牛仔膝，肉地夠嫩滑，份量亦唔係一味夠大就得，最好係一吋厚，否則會韌到咬甩牙，至於烹調，通常會用傳統方法，即以大量燒過的雜菜打爛加番茄、香草熬汁再燴至軟腍入味，以雜菜的清甜襯托出牛肉的濃味，食完肉千祈要記得食埋最精華部份——牛骨髓！
試味報告：牛仔膝肉地腍滑，肉味濃郁，富口感，醬汁菜味清甜，有輕微香草味，但骨髓略羶，這點則並非人人都能接受。
中式的春卷皮有如吸油紙，炸一炸就索滿晒油，見到就怕，有見及此，大廚以法式的Filo紙取而代之，Filo紙的特點是要保持乾身，所以餡料選配乾爽豬肉鬆，捲成春卷形後輕輕一焗便成了這款法式春卷。隨卷附有一小碗紅酒啤梨汁，是用糖水、紅酒、啤梨煮成，經過一輪熬煮，酒中的酸味揮發而剩下葡萄香，同春卷成為嶄新配搭。
試味報告：Filo紙非常鬆化，薄得有入口即溶的感覺，肉鬆鹹得惹味，同Filo紙配搭夠新鮮，紅酒燴梨汁香甜無辛辣酒味，就咁飲都得！
店名：MyPlace
地址：25275223
電話：中環士丹頓街32號地下
座位：18個
營業時間：星期一至六中午12時至下午3時，晚上6時至午夜12時；星期日晚上6時至午夜12時。
付款方法：現金及信用卡（Visa,Master,AE及Diners）