拍拖三年　見阿Paul仍心跳
朱茵寸星爺：做朋友都不如

朱茵日前接受新城訪問，她大讚黃貫中是很好的男友，二人拍拖時更變得盲目。但當她談到一位影壇舊愛，則大數對方不是，令人相信她所指的就是周星馳。

朱茵日前接受新城娛樂台的《娛樂一早》訪問，曾跟周星馳（星爺）拍拖的她，在訪問中暗寸舊愛影壇大哥，又大讚現任男友黃貫中（阿Paul）。

「大哥表面風光」
問朱茵的擇偶條件，她說：「唔可以花心，唔可以大男人，唔錫屋企人都唔得，唔專一同金錢掛帥都唔得。」對於過往曾跟星爺拍拖，但結果分手。朱茵說：「做得朋友就唔使分手，邊有再見亦是朋友，唔好呃人呃自己。如果知道件事係嘥時間同青春，呢啲做朋友都不如，道不同不相為謀。」
朱茵當年被指借星爺上位，她反駁說：「佢身邊咁多女人，除非我自己好鍾意佢，否則唔會愛上呢啲人。人與人要信任，大哥表面好風光，午夜夢迴，邊個喺佢身邊都唔知。佢覺得有安全感咩？反而大哥身邊愈多人，愈冇安全感。」朱茵表示若在公開場合遇見舊愛，她打完招呼便行開。

「拍拖似盲咗咁」
不過當朱茵提到男友阿Paul，馬上變得甜蜜。她大讚阿Paul：「我哋拍咗拖三年，其間好似盲咗咁，我哋只係見到對方，大家都睇唔到第三者。我𠵱家見到阿Paul都重有心跳嘅感覺，佢真係對我好好，係真心對我，佢好知我諗緊乜嘢。我唔知將來發生乜嘢事，但呢一刻佢係最適合我。」