陳寶蓮日前在上海自殺身亡，不少圈中人皆表示十分愕然，且為她遺下的初生兒子感到十分擔心。
羅家英 ：我同陳寶蓮合作過電影《國產凌凌漆》，不過就冇對手戲。可能佢今次諗得好清楚，或者佢咁做會覺得舒服啲，不過個BB就慘啲，不如等我領養佢啦。其實生存係講勇氣，何況佢事業同愛情都唔係咁得意，所以先諗唔開。
張堅庭 ：今次係個好警惕，長期服用藥物係會令人抑鬱，其實香港藝人都需要心理輔導。
章小蕙 ：我唔識陳寶蓮，不過我都試過產後抑鬱症，呢樣嘢係好嚴重嘅事，好需要個丈夫幫嘅。我當年每日餵人奶十四次，BB初生時每兩個鐘就要餵一次，之後又要掃風又要清潔，由天光忙到天黑，嗰陣時喺窗邊真係有衝動跳落去。
薛家燕 ：陳寶蓮咁靚女，非常可惜，佢媽咪同我喺同一間髮型屋恤髮嘅，雖然只係打過幾次招呼，但知道佢媽咪為咗個女都好痛心，佢媽咪試過想幫佢，但陳寶蓮都冇接受。目前希望小朋友嘅爸爸出現，可以畀小朋友一啲安定日子。
劉德華 ：同陳寶蓮未合作過，都係睇電視先知，過往睇到佢嘅新聞都好擔心，之前就希望有人喺生活上可以幫到佢，但好可惜最終佢都自殺身亡，總之做人最緊要自愛。
羅霖 ：其實產後抑鬱症係因為冇心理準備下生咗BB，又唔知點處理。而產後家人同老公嘅支持同傾訴係最重要嘅。
蘇永康 ：我十年前識陳寶蓮，係朋友介紹嘅，但只係點頭之交。我覺得好可惜，因為佢啱啱生埋仔，希望娛樂圈遲啲可以多啲好消息。
羅嘉良 ：我同佢唔熟，不過好多年前我同佢去過大西洋一齊登台，我聽到都覺得好可惜，佢又唱得又靚。