公務員慶回歸書畫賽得獎作品噚日展出，有五千幾份各地作品參賽。八方一睇，二百幅得獎作品中，香港公務員佔咗四十幅，其中一半來自警隊。香港獲獎名單排名最高嘅書法二等獎得主，係駐守元朗嘅警員馬潤憲。
點解差人忽然咁文雅？原來關曾一哥事。事緣曾蔭培未做警務處長時，已經在警隊大力推動「健康生活之道」，鼓勵同袍參加文化活動。在場有啲差人都承認警隊嘅負面新聞唔少，唔係欠債就係北上尋歡。學吓書畫，人都斯文好多，對改善公眾形象有幫助，所以佢哋成立咗「香港警察書畫學會」。
曾一哥本身對書畫藝術亦好有興趣，後生時讀金文泰中學，學過四年書法，臨摹王羲之。其後佢追隨名設計師靳棣強嘅父親靳微天學畫國畫。不過，一哥笑說今次冇參賽，費事人哋知佢個名，「出貓」讓佢贏。
（圖）曾蔭培與得獎下屬黃大仙警署警長郭耀偉合照。
傳真︰2623-9278
電郵︰