「超班馬」俄羅斯隊不消一個小時就將德國打得落花流水，好彩賽會早有安排，一早邀請咗舞龍舞獅喺空檔表演（否則喺第二場比賽開賽前嗰個幾鐘流流長，球迷都唔知做乜好），總算值回票價。
噚日嘅入場人數約有七成，大會為咗搞好氣氛，搵咗二百幾個後生仔女，穿着不同隊衣為各參賽隊伍打氣助陣，看上去熱鬧之餘，各球員亦比平時比賽特別出力吧！
每逢有女排大獎賽，精品攤檔就一定少不了，今年亦唔例外。例如中國旗仔（5蚊）、排球波仔（20蚊）、毛巾（15蚊）、電話繩（20蚊）等等，應有盡有，全部印住大獎賽嘅嘜頭。據看檔嘅人講，排球波仔就最受歡迎。講真，鍾意排球嘅人一定唔介意花少少錢買啲紀念品番屋企嘅。