李華度好波就係人都知，但原來佢待人處事更加係世故非常。話說佢婉拒咗荷杜好意，冇委身加盟熱刺而投AC米蘭後，識得整番封信畀荷杜解釋唔去嘅理由，令荷杜條氣順晒。
荷杜日前好感慨咁話，佢隊波差少少就可以簽入李華度，而李華度嘅風度就令荷杜留下深刻印象：「李華度話AC米蘭畀佢嘅條件好好，令佢無辦法抗拒。我做領隊咁多年，都未試過收到唔肯嚟嘅球員回信解釋，呢啲就係『卡士』嘞。」無錯，李華度咁識做人，我求大俠都要寫個服字。
查實世界仔又點止得李華度一個。朗拿度前日返老家聖保羅嘅一間基督教堂，感謝神響世界盃期間一直守護佢。另外佢又順道去癌病醫院探訪兼捐錢，又出錢又出力，重唔攞足一百分形象分？抵佢有咁多球迷擁護。
費倫天拿會長呼籲佛羅倫斯市民捐款之餘，又卑躬屈膝搵有錢總理貝盧斯科尼幫忙，可惜都解決唔到財困問題，唔可以踢聯賽，可能要改名參加丙組賽事。唉，想當日費倫天拿幾多球星，幾咁風光，今日搞成咁確令人不勝欷歔。我求大俠突然醒起，費倫天拿一年前重係意大利盃冠軍……。
李鐵已經飛去愛華頓，展開英超征途。呢位國足猛將都有自知之明，知道語言係佢響英超立足嘅最大障礙，所以帶晒《英語口語一千句》、《中英口語對照》、《速成學習英語》等書籍過去。不過我求大俠奉勸佢咪掛住學英文而忽略練波呀。