「仙股除牌」建議，搞出一個大頭佛，分分鐘鬧上立法會，李業廣、鄺其志好唔得閒，「仙股除牌」啱唔啱，各有說法。左丁山睇完幾十間上市公司嘅火爆廣告之後，問大經紀有乜評論，估唔到大經紀劈頭第一句就話：「我以後唔同呢啲公司來往？」乜咁激呀？大經紀話：「仙股除牌係有道理嘅，唔少公司係刻意去玩啲散戶嘅，根據現行規則，要除佢哋牌，保護散戶，要嘥好多好多時間㗎；以後有咗一個數量基準之後，就會容易好多，都係為咗香港好，散戶好啫！」
大原則冇人同佢拗，問題出在手法。心水清嘅人一定知道樹大有枯枝，股票市場利之所在，點會冇人趁機上下其手吖。不過港交所上星期四嘅做法，令人諗起美國軍隊在阿富汗追擊塔利班，誤炸民居。有常識之人，都唔會相信美軍無端端去炸平民，梗係收到線報先至去炸，但塔利班分子或拉登分子匿藏民居，一炸之下，死嘅係平民，未必係塔利班噃。又或以色列軍隊要求擊殺哈馬斯頭子，不惜搵巴勒斯坦平民兒童陪葬，達到結果之餘，就殺錯不少良民。殺賊嘅人命代價係唔係咁高呢，唔該大家諗清楚；港交所、證監會、馬時亨、梁錦松對「仙股除牌」建議，不妨以此為參考。
大經紀久歷沙場，人格高尚，為原則做事，有佢嘅道理，值得尊敬。不過左丁山以為割毒瘤要用手術刀，唔係用機關槍。