港人內地置業，首選深圳，由幾個學會組織，組成香港房地產專業服務聯盟，六十幾人組團上去考察，之後分析發現，原來港人買深圳樓，選擇標準係價錢、交通、配套、發展商品牌及管理。六七成鍾意買連裝修單位。港人喜歡返內地執平嘢，估唔到買樓都係同一心態，價錢至上，乜都係假。
不過，內地人嘅標準就唔同，佢哋最重視發展商個名，價錢其次。睇嚟香港大型發展商去深圳賣樓，應該有着數。唔怪得和黃都去深圳推售福田黃埔雅苑。
至於較少人提到嘅管理問題，喺裝修期間，維護大廈嘅完整性較為困難。特別係冇裝修嘅毛胚房，唔係咁易控制安裝空調與窗花之類。而且新業主唔熟悉管理安排，所以管理公司不能與業主充份溝通。
香港房地產專業服務聯盟係由香港地產行政學會、香港物業管理公司協會、香港房屋經理學會及英國特許屋宇經理學會亞太分會組成。今次北上成員之一，有中國海外張小傑。該公司喺內地都好出名！
「我怕嘈」、「想淨係一個人」，聽落好似家庭問題，但原來係新地最新版電視廣告內容，帶出每個年輕人渴望擁有自己天地嘅原因，而新地就用「以心建家」口號，滿足市場需要。
新地前年拍過一輯《獅子山下》版廣告，針對成年人，今次呢輯廣告《101個置家理由》係延續篇，對象係三十五歲以下年輕人。佢哋大多自我一啲，好騎呢，有時重可能會有啲莫名其妙。
今次呢輯廣告，陳列多個年輕人想買樓嘅原因，對比鮮明。好似「我怕靜」，之後鏡頭一轉就係「我怕嘈」；「唔想一個人住」，之後係「想淨係一個人」等。新地散播「以心建家」意念，除咗家居，重充滿以香港為家嘅情懷。結尾係萬家燈火，正好顯示對香港嘅信心。
若果未睇就要快手，下個禮拜一就播完。不過好彩下個月會再播，呢個安排係廣告策略嚟嘅。
另外，新地贊助嘅「生命共嚐」美食展，今個禮日係最後一次，地點喺葵芳新都會廣場。連埋新地嘅馬灣珀麗灣示範單位參觀人潮，相信度肯定會。
長實噚日推出尖沙嘴港景峯第3座70樓全層，買家若果購作自用，可以免費入住紅磡都會海逸酒店總統套房一個月，值成八十萬，每晚值兩萬六。
買家重有權揀幾時入住，但一揀定就要住足一個月。
呢個總統套房，聽講有二千方呎，兩個房，重有五百方呎平台花園。收咁貴租，設施唔使講梗係好豪啦！
原來第一個book呢個總統套房嘅，係藝人陳慧琳，租咗三晚，喺開完演唱會之後用嚟搞慶功宴，不過佢有冇真正入住過就唔知。
長實紅磡海名軒大搞內地富豪睇樓團，其他發展商跟風。嘉華地產上個禮拜六就請嚟廣州一班闊佬，參觀九龍塘嘉皇臺及何文田嘉豪軒。聽講佢哋鍾意嘉皇臺2300方呎單位及嘉豪軒高層相連單位，相信因為住慣過千呎。不過，富豪猛問回報，似乎想收租多過自住。
嘉華冇搵過地產代理幫手，究竟點樣搵到呢班闊佬？原來佢哋係舊客，好多買咗嘉華廣州嘉和苑第三期御庭．湖軒。有辦可睇，所以對嘉華香港樓盤有信心。
嘉皇臺有94個單位，內購賣出二十幾個，下月賣現樓。嘉豪軒就賣咗九成，已經入伙，可以即買即住。
該公司重有個靚盤窩打老道嘉多利豪園，點解唔畀班富豪睇？據講話因為示範單位未搞掂，惟有留番今個月以現樓發售。
蘭西
電郵地址：