超人李嘉誠嘅生意真係衣食住行乜都有，英國《衛報》噚日報道，和黃喺英國搞第三代流動電話（3G），同色情事業一哥──《花花公子》（Playboy）合作，向旗下3G手機提供軟性色情訊息。嗰篇報道的標題都幾抵死，叫做「性可以拯救3G手機嗎？」
其實，幾年前3G係萬應靈丹，一話搞3G呢間公司股價就大升；但𠵱家就係票房毒藥。好似和黃咁，押重注喺3G身上，結果成日俾分析員話係隱憂。和黃諗住十月喺英國同埋意大利率先推出3G服務，如果不能打響頭炮，以後想成功就更難。
有間研究機構話，通過流動電話傳送色情內容，到咗二○○六年，每年盈利可以有成四十億美元，咪話唔和味！難怪超人都要轉「性」。
傳真︰2623-9278
電郵︰