阿松不認不認還須認，終於肯話上個月中已經同跳水皇后伏明霞喺美國夏威夷秘密結咗婚，但八方就八到，新婚嘅松哥哥原來兩個禮拜冇同「松嫂」喺官邸相聚！唔通佢另有愛巢？
宣布再婚後，阿松噚日返工都幾好笑容，重同守通宵嘅記者揮手，淨係唔肯停低講吓點解結婚要搞到咁神秘咁匆忙？
唔止結婚結得匆忙，連返工阿松都趕過人。佢架FS專車遇上黃泥涌峽道天橋塞車，阿松竟然又再次知法犯法，佢有在雙黃線上落嘅前科，司機將架車喺天橋「雙白線」調頭改行司徒拔道轉落馬己仙峽道返政府總部，有相為證冇得賴，唔知交通部會唔會寄番張傳票畀佢？
八方問法律界人士黃國桐點睇，佢話即使係高官都要守交通條例，冇豁免被抄牌嘅特權，當然高官能指出他正為急事，例如有病趕往醫院治療就另作別論，不過阿松唔似有病。
法例規定，車輛司機喺雙白線調頭可被罰款四百五十元，重要扣三分。
各方對呢單喜訊嘅反應多數係恭喜阿松，至於恨唔恨飲佢個餐，煲呔話補唔補擺喜酒係阿松私事，葉澍堃就希望阿松請飲，中央政策組首席顧問佳叔就希望阿松同小伏可以適應身為知名人物嘅壓力，樹立良好夫婦典範。
除咗香港，內地網民反應都好熱烈，有人質疑「能長久嗎？」有人為小伏前男友南方抱不平，有人則希望「伏明霞能學宋慶齡」、「去香港當國母！」更有網友贈興，形容兩人是天作之合，還送上對聯，曰：「執子之手，錦松耀明霞；與子偕老，連理傳華夏。」
傳真︰2623-9278
電郵︰