夏日求驗客：
羅馬半放棄　「巴迪高」變33號仔

羅馬早兩日公布新一季球員球衣號碼，巴迪斯圖達將會改穿「33」號波衫。回想兩年前「巴迪高」一去到羅馬即刻同蒙迪拿爭做「9」號仔，睇嚟呢個命運鬥士都敵唔過歲月摧殘，冧巴愈着愈大；可能代表會方無以前咁重視，慢慢步入養老期嘅佢。
不過話時話，「33」號都唔錯吖，代表佢年齡嘛。咦，咪住，「3」乘「3」咪等於「9」，真係唔知有心定無意嘞，巴迪高始終同最心愛嘅「9」號結下不解緣。

阿倫史密夫躁狂「難頂」
列斯前鋒阿倫史密夫喺前晚對泰國明星隊場友賽好躁，連球證都頂佢唔順，要求雲拿保斯半場換走佢。雖然雲拿保斯事後幫史密夫解釋，話足球比賽難免有身體碰撞，但我求大俠認為列斯如果唔係有科拿受傷，雲拿保斯真係未必幫佢幫到出面。咁樣睇嚟，史密夫真係要好自為之嘞。

「老麥」自私話皇馬夠腳
繼日前卡洛斯之後，麥馬拿文都話皇馬唔需要再買人，但係兩人嘅出發點絕對唔同。卡洛斯喺皇馬打硬正選，對自己隊波有信心；但係成日坐冷板櫈嘅老麥，就梗係唔想有多啲行家嚟爭食，梗係啦，佢人工唔平㗎，最近重結埋婚，以家庭為重亦無可厚非嘅。

熱身賽要睇賠率做人
幾個主要聯賽球季重未開鑼，各大球會踢緊嘅熱身賽成績就成為目前焦點之一，不過佢哋嘅對手好多都係啲比較陌生球隊，好在博彩公司間中都有為呢啲熱身賽開盤口，有心嘅只要昅實賠率變化，多少都掌握到佢哋對手嘅實力，咁就知道賽果正唔正路啦！