雖然日本製嘅中型轎車，響香港備受歐洲車壓力，銷量經已大不如前，惟本土銷售仍能維持在高水平，因而各間日本車廠亦不遺餘力，開發新一代車款。其中本田方面經已披露響嚟緊10月（右圖），推出全新日本版Accord新車，除尺碼較現有為大之餘，造型重酷似北美版Accord㖭！唔知日後Accord嘅本土及出口版，會否拼合成一個車款，以減低成本同生產線嘅壓力呢？全新Accord車系，頂級版配備一台2.0公升直4i-VTEC偈至為矚目，皆因輸出有成210匹咁多㗎！至於另一邊廂走高性能房跑車路線嘅富士，亦經已披露明年正式面世嘅全新Legacy車系（左圖），不論四門轎車或五門Wagon型號，賣相同樣變得入時有性格，輸出280匹嘅Turbo偈同全時間AWD驅動系統，仍屬車系嘅主打賣點。