馬時亨及梁錦松終於表示肯對除牌風波負上責任，不過佢哋第一步已經行錯咗，就係想將責任徹底推喺鄺總身上，而鄺總在立會上又準備充足，應對如流，可謂盡領風騷，相反馬時亨就成為眾矢之的。新政策推出難免會惹來到市場既得利益者反咬，但鄺總在補救本身形象方面得分頗高，呢種人才去邊度搵，如果阿虎係阿董，一定要搵佢做內閣智囊，肯定可以幫阿董改善形象。
今次事件令到證監會條氣唔順，結果要對當日股災有否受到操控進行調查，令到證券行進一步對細價股孖展倉進行迫倉。兆晉國際（491）終於證實大股東被斬倉，且重有成8億股押在財務公司手上，尚未沽出，雖然股價噚日再反彈3.7%，但危機未過。光訊控股（254）噚日急挫84.5%後停牌。黑客話佢同兆晉情況差唔多。佑威（627）噚日又再腳軟，股價跌7.14%，成交達1200萬元，對待啲股仔，大家真係要小心。
比亞迪（1211）首日掛牌，雖然認購表現唔算突出，但股價表現不俗，收12.20元，較招股價高出11%，成交達3.83億元，都算對認購者有交代，百記亦冇失禮人，不過呢隻股市值唔細，究竟百記可以撐幾耐呢？
長江生命科技（8222）噚日重上招股價2元，但Cookie話大戶暫時唔會咁快將股價推高，因為大戶重衡量緊細價股股災對散戶嘅殺傷力有幾大，若殺傷力不大，散戶資金可能會轉馬至長科炒作，屆時大戶至會將股價推高散貨。
阿 虎