民政事務局局長何志平上場十幾日，已風塵僕僕，四出拜會，噚日何局長就同對佢特別有爭議聲音嘅文化藝術界茶敍。向來勇於發言批評嘅胡恩威也有到場，八方見佢同何局長握握手，二人即時相約再見面，唔知會唔會做個好朋友呢？
不過，二人似歡喜冤家多啲。胡恩威笑言，佢唔會為反對而反對，但局長應該避免只做公關，做多啲實質內容。何志平就笑稱，胡恩威話要考慮下，才決定見唔見佢。何局長喺致辭時坦言，希望文化界攜手同心，不斷同佢溝通，「畀我能量」，同舟共濟、厚德載物。但對此，胡恩威就唔多欣賞，重叫大家等多一段時間先。
今次應邀出席嘅文化藝術界人士中，粗略估計約有三分一，都曾經有簽署反對佢嘅「藝發局養懶人」言論。其中香港藝術中心總幹事茹國烈坦言，出席茶敍與當日嘅聲明無關，佢亦覺得何志平係有誠意溝通。
（圖）胡恩威（左）同何志平（右）握握手，一笑泯恩仇。
傳真︰2623-9278
電郵︰