Hello！係我NelNel張學潤呀！見到我唔好以為我又彈邊個明星着衫冇品味，邊個又着錯衫，雖然我成日都彈人唔識着衫，但係我都係想大家有改善啫，由今日開始我會一連五日喺星級教室教一眾姊妹點着衫先叫靚！
我喺街度見到好多女仔好靚，但就唔識着衫，或者着錯衫，又或者將潮流興啲乜嘢就擺晒上身，毫無美感可言。就好似今個夏天流行層次感着衫法，但點配襯先好睇呢？
其實好簡單，只要用牛仔褲配紗裙就已經突出層次感，重好好睇㗎。如果生得比較高瘦嘅女仔，就可以選連身裙配牛仔褲，咁就好有型同有線條。至於有啲女仔可能生得比較豐滿或者身形較為矮小，其實可以用顏色同剪裁去配合，例如選啲較深色同短身嘅紗裙去着，當然如果好肥好矮就唔好咁着啦！
而着呢類有層次感嘅服裝，千萬不要太濃妝，只要化得清啲，簡單勾畫出五官輪廓，而所用嘅粉底亦要貼近自己嘅膚色，就已經好舒服自然。我覺得短頭髮好適合呢類咁後生嘅着法，不過如果長頭髮，就將佢紮成辮或馬尾都一樣好好睇㗎，正所謂：「層次式着衫法，學識唔會亂咁紮！」
（五之一）
口述：張學潤
筆錄、攝影：馮美茵
示範：湯寶如
服裝：D-MOP、VivienneWestwood
化妝及場地：BeautySquare