高官問責制這班雜牌軍丙組波一落場，就有猛腳急不及待出擊。不過攻門的不是3R料子，腳法盲舂舂，不但沒有將皮球直送入龍門，反而勁射過高，扑暈球迷。球迷扔汽水瓶洩憤，高呼出醜的球員的名字，請他出局。場邊的教練金雞獨立，木口木面，不發一言。心底打乜算盤，無人知。
球賽開波一陣已經有國腳被紅牌逐離場，相當罕見。正如高官落馬遊戲，上演得比預期快，實在始料不及。
由此而衍生的投機工具，亦五花八門。賭徒從細價股損手後冇幾耐，即刻可以轉手風，玩過另一種大細買賣，就係賭邊位局長首先落台。有投機就老竇都冇情講，拋空做勢、放風質殘某隻「局長股」是閒事。買局長期權、窩輪亦受。一旦某位局長的股價跌至仙股，即刻除牌，睇好的股民隨時渣都冇，睇淡那方賺到笑。這就是高風險高回報的外圍遊戲，股民落疊，你情我願，輸錢也不會賴地硬。當下最多人議論的局長仙股，有「葉瘤」和「馬屎坑」兩隻，今日內幕消息言之鑿鑿，又加多一隻2號仔「阿蟲」。小道消息滿天飛，所謂小股民，有賭未為輸，永遠不愁寂寞，董特首領隊落場的賽事，踢足五年咁長，真箇千金散盡還復來。蒸發的才56億，不過是英、巴那場世紀之戰的波纜的一個零頭罷了。