陳可辛監製嘅電影《三更》，喺本月十五號就正式上畫，而呢套戲係講發生喺韓國、泰國同香港三地嘅三個唔同古仔，主題就全部圍繞古老傳說，不過片中亦有唔少核突鏡頭，足以挑戰電檢尺度。
黎明同原子鏸家姐原麗淇主演嘅《回家》，就講扮黎明老婆嘅原麗淇死咗，飾演中醫師嘅黎明就將老婆嘅屍體浸喺浴缸，日日用「不死藥」同佢洗身，所以原麗淇至會喺黎明面前拍咗呢場全裸戲。
而韓國嘅單元古仔《回憶》，就講韓國男演員鄭普碩成日發惡夢，喺夢中佢老婆用手指鑽頭兼甩手指，十分核突血腥。
至於另一個泰國單元《輪迴》，就講一個當地嘅街頭賣藝者，因為執咗有詛咒嘅木偶而搞到自己全身劇痛，邪靈更到處殺人，所以亦搞出好多核突畫面。
陳法蓉（Monica）、李華同謝君豪噚日喺中環立法會外為亞視新劇《虎差》進行拍攝，劇中飾演家姐嘅陳法蓉為妹妹李華爭取居港權，所以同一班志願人士齊齊喺立法會門外抗議。Monica講開之前屋企隻狗仔俾大狗咬傷嘅事，好勞氣咁話：「我已經準備從民事訴訟去告個狗主，我唔係要追究錢嘅問題，而係想畀個教訓佢，𠵱家我都搵緊屋搬，因為佢隻狗已經係第二次咬我隻狗。」
章小蕙雖然欠下裕泰興二億五千萬元，但佢重日日都打扮靚靚咁出街。章小蕙前晚去咗中環KeeClub消遣，玩到晚上十一點幾就獨自離開。章小蕙話：「我一陣都冇邊度再去，我會返屋企，頭先喺KeeClub都係開會啫。」
新任「啤妹」黃琛瑜（Eva）拍完啤酒廣告後工作接踵而來，除咗廣告不斷外，前兩日重簽咗王晶旗下嘅電影公司，嚟緊會同王晶合作兩年，主力向電影方面發展。Eva簽約之後表現得好開心，佢噚日話：「今次真係求之不得，都好開心㗎，起碼會有工作做，會安心啲。」
羅文再次入院後，各方好友均紛紛探病，前晚八點幾，蔡一傑就去咗瑪麗醫院探籮記，逗留咗半個鐘之後就走，問到籮記病情時，佢話：「精神幾好呀，佢都準備瞓覺！」而噚日張徹太太及籮記助手阿東都輪流去探病，阿東話：「𠵱家佢喺入面睇緊《逐個捉》，過兩日就會出院。」
葉佩雯(Grace)噚日喺中環出席「HennessyV.S.O.PMusicDiscovery」嘅記者會，佢話遲啲會搞一個小型演唱會。久未露面嘅Grace話自己已經有一年冇開過演唱會，所以近來都要勤力啲練歌。Grace重話同英皇嘅合約問題重未解決，不過公司都有幫佢安排工作。