比亞迪（1211）噚日上市表現真係勁，收12.20元，較招股價10.95元高出11.42％。至於另外一隻挾住上海交通大學之名嘅交大慧谷（8205），走勢就有如過山車。
交大慧谷招股價66仙，早市一度被質落最低32仙，之後喺成班上海幫力托之下，收65仙，但仍較招股價低1.52％。不過睇番成交股數唔夠8球，反映街貨根本唔多。
小初睇番交大慧谷嘅股份分配公告，先知道股份集中於少數大戶手上，挾住交大之名，但都係成班大陸fans自己坐番晒。有時小初真係唔太明白，好多細細隻嘅創業板股，全部係自己大陸同志要番哂，你話搞上市有咩作用，唔通只係用嚟炒？
另外，當細價股五癆七傷之際，竟然有人夠膽搞批股，上海策略置地（164）噚日就傳搞先舊後新配股，重要批成70至80球貨，睇落認真唔簡單。
慕容小初