一向以嚟，MP3Player市場都畀韓國、台灣等產品威晒，雖然音效產品老大哥CREATIVE都有定時推出新產品，可惜售價往往偏高，變相普及性不大。為進一步擴大呢個市場，CREATIVE特意推出兩款極具創意嘅MP3Player，而且賣價較以往平得多。
記者、攝影：徐影龍
ImageGirl：Natalie
最細最輕可謂MP3Player一向致力發展嘅特色，而呢部MuVo就做到真正全球最輕同最細，機身面積只有73×35mm，厚度為16mm，比普通打火機重要細，唔計一粒3A電，重量更只得28g，相當之小巧，攜帶出街都好輕便。
MuVo一詞其實即係MusicVoyage（音樂旅程）嘅縮寫，意思即係令用家感受到輕鬆簡便嘅音樂旅程，因為MuVo毋須音樂軟件、驅動程式已可運作，大部份電腦都可偵測到，所有歌曲毋須專用軟件便可抄至機內，令不諳電腦用家都可享受到MP3嘅樂趣。目前除Windows98及SE外，所有Windows系統包括MacOS都支援。
最得意係MuVo可跟電源裝置分拆，將主部份抽出嚟，直插電腦抄歌，好處不但可免卻連接USB線嘅煩惱，而且可將歌曲以外嘅檔案抄至機內作備份，十足十熱賣嘅記憶體手指咁，為MP3Player增添實際用途。另外支援Windows嘅拖拉功能，所有歌曲或檔案，只需一拖一放抄至機內，便懂得自動搜尋對應嘅歌曲。MuVo分內置64MB及128MB兩個版本推出，128MB要到8月尾先有貨到港，暫時只得64MB版本見街，不過並非公開發售，想率先獲得嘅話，只可透過參加網上行$298無限寬頻上網計劃便可，詳情可致電網上行查詢。
記者意見
抵讚：全球最細最輕機身攜帶的確方便，操作上亦已做到最簡化步驟。
要彈：功能太少及欠缺屏幕。
網上行申請熱線：28881888
獨樂樂不如眾樂樂
第二部MP3就較為搞鬼，呢部TravelSound最大特色係內置兩個4W喇叭，可直接播放機內MP3歌曲，喇叭以鈦金屬製造，令聲音重播更為精細，現場測試時，發覺4W喇叭輸出不弱，聲浪頗大，而且將音量調校至最大，都唔會出現「拆」聲情況，值得一讚，以後可跟朋友一齊分享心愛歌曲，唔會一個人聽咁悶喇。不過亦因為喇叭關係，令機身增大不少，並非行街搭車時聽歌嘅好選擇。
TravelSound內置32MB記憶體，若想添加歌曲，可透過SM插槽作擴充，值得一提係用家接駁電腦後，可直接抄寫或讀取唔同種類嘅檔案至機內，變成一個SM嘅讀卡器。
既然TravelSound內置兩個質素不俗嘅喇叭，齋播MP3可能有啲浪費，透過機後嘅聲音輸入插頭及轉換線，便可接駁各式影音裝置，例如遊戲機、Discman等，筆者測試過駁上GBA，在街上打機，大大聲真係好好Feel。
TravelSound機前設有一個小型Mic仔，可收錄現場聲音，測試時以不同位置發出聲音，以確定TravelSound嘅收音功能，發覺雜聲較少，人聲可清楚收錄，最啱做訪問、講座等用途。內置嘅32MB約可收錄兩小時聲音，可惜錄音功能係唔支援記憶卡擴充，唔可以收錄多過兩小時聲音。
記者意見
抵讚：有喇叭嘅MP3機隨時都可同朋友分享，更可接駁其他影音裝置。
要彈：體積太大唔可以收係衫袋，欠缺各種音場播放模式。
CREATVIELabs(HK)
查詢電話：23312930