港交所在上星期四（七月二十五日）宣佈《上市資格諮詢文件》，《蘋果日報》財經版嘅報道最詳細、最清楚。諮詢文件內分「除牌建議」、「處分建議」、「簡化程序建議」、「主板上市申請資格的改革建議」，共二十一項，夠晒全面。
諮詢文件上星期五見報後，引起細價股股災，散戶怨聲載道，鄺其志、馬時亨兩人輕率行事，呢勻大鑊矣。左丁山素來支持自由市場，細價股便是細價股，何必一定要將啲五毫子以下嘅股份踢出市場。創業板委員會主席羅嘉瑞最有sense，叻過鄺馬二人幾皮，佢對除牌建議好有保留，實在醒目，正所謂大有大買、細有細買，一啲散戶鍾意炒細價股，咪由得佢囉，使乜港交所理，𠵱家一理就理出個大頭佛，星期日港交所急急轉軚，話明撤回除牌建議，容後再諮詢，進退失據，鄺其志想續約做港交所行政總裁，難度又增一分。
大編輯認為港交所上星期排隊出新聞，上市委員會啦、除牌建議啦、延長交易時間啦，其中以除牌建議最具殺傷性，點解唔喺星期五宣佈，等投資者有兩日半時間消化吓，唔會產生即時衝動性反應呢？延長交易時間建議，全無影響力，點解唔喺上星期四公佈先呢？更有甚者，港交所在前星期末就向《南華早報》放風，「南早」搶先引述消息人士講「諮詢文件」內嘅建議，但「南早」邊會引起散戶注意呀，大家都睇唔到，港交所如要放試探氣球，點解唔搵《信報》、《經濟》或者《蘋果》呢？大編輯嘅結論係，港交所啲公關好唔掂。