藍籌股開始進入業績期，今日率先派中期成績表嘅有東亞銀行（023）。東亞昨日股價表現唔錯，升35仙，收市報15.05元，帶動隻東亞Call輪9164飛升60%，成為是日輪王。
9164係末日輪，下周四最後掛牌買賣，隻輪昨日大升，一啲都冇夾硬嚟，完全合理。
正股昨升35仙，9164早已平水，由於係10份輪兌1股正股，跟足應該升3.5仙，𠵱家9164由5仙跳上8仙，已經升少半仙。
未來幾日，9164波動依然唔會細。經過昨日變化，隻輪已有輕微折讓0.8%，槓桿率有18.8倍。正股今日若郁動2-3%，隻輪隨時上落40-60%。呢隻輪風險好高，成交又疏，唔啱一般人玩。
地鐵（066）亦係今日公布中期業績，股價昨收9.75元，微跌5仙，但隻地鐵末日輪9146收12.6仙，跌咗15%，發揮槓桿作用。
9146本月12日到期，行使價9.78元，同正股現價好接近，未必變廢紙。現價買入9146，正股若升上10元，即有7成利潤，當然風險亦極高。
章 盛