Twins將於九月十三和十四日舉行兩場個唱，門票前日公開發售，不過有fans向英皇投訴，致電信用卡購票熱線常因線路繁忙未能接通，有關方面為此增多十條電話線。Twins則透露屆時會在台上表演高難度動作，而且請了史上最強的嘉賓出席。
二人組合Twins於九月十三和十四日在紅磡體育館舉行兩場演唱會，演唱會門票於前日正式公開發售，所有八十元的平價門票，前日在短短十分鐘內全部售罄。
不過，據悉有fans致電到信用卡購票熱線，但經常因線路繁忙而未能接通，不少fans於是致電到Twins所屬的英皇娛樂投訴。昨日記者致電英皇經理人部門負責人霍紋希查詢，她表示對此事感到抱歉，她說：「熱線電話原本有三十條線，估唔到都唔夠用，的確有fans打過電話嚟公司投訴，英皇都覺得唔好意思，已經臨時要求信用卡嗰邊加多十條線畀fans買飛，𠵱家暫時都可以應付到。」
Twins昨日接受本報電話訪問時，對演唱會反應理想表示高興，Twins說：「我哋好開心，話晒今次都係我哋處女演唱會，初時都擔心反應唔夠好，𠵱家聽到去飛去得咁好梗係開心啦，我哋一定會全力以赴做到最好。」
Twins還表示屆時會出動秘密武器，Twins說：「我哋到時會喺台上做一啲特別高難度嘅動作，重會請史上最強嘅嘉賓出席㖭！」問她們是否所有英皇歌手都會出席助陣，兩人賣關子說：「唔講得住，到時咪知咯！」而Twins早前到日本拍攝的寫真集，明日便開始發售。