噚日班財經記者都好奔波，財經事務及庫務局長馬時亨見完港交所行政總裁鄺其志後，某財金官員又開吹風會。大家喺中環好唔得閒之際，八方忽然收到風，話證券商協會主席蔡陳葆心會見「重量級人物」講「仙股事件」，時間係晏晝四點幾，但係與會人物同地點就亂晒籠。有人話係董建華，有人話係梁錦松或者馬時亨。地點都有三個版本，一時話係中華總商會，跟住又話係中華廠商會，最後答案係華商會。好彩都係喺干諾道中，八方跑幾步就到。
由於華商會係私人會所，所以成班記者惟有企喺街，撞正放工時間，干諾道中人來人往，大家見到電視同電台駐晒重兵，重以為中環發生乜嘢大件事。
八方上到華商會見到蔡太，佢同緊兩個證券界人士飲茶傾偈。佢話只係研究下今日向立法會反映意見，無約到乜嘢猛人。八方心諗，放風靠害嘅人真係大整蠱。
傳真︰2623-9278
電郵︰