早前，鈴木推出一款時尚可人嘅MRWagon，想唔到不乏男士買家追捧；有見及此，為迎合剛性一面嘅需求，代理瞬即引入有大包圍配套嘅SportyStyle型號，令原本別致吸引嘅MRWagon，盡現有活力剛勁一面，睇落又真係幾有瞄頭噃！
記者、攝影：陳偉林 新車售價：$99,910 車輛提供：香島汽車（23320091）
造型圓渾別致，給人有「迷你子彈頭」暱稱嘅MRWagon，原來裝上呢套包含前後氣霸、整流器、兩邊車身裙腳嘅SportyStyle配件，加上原有四輪合金軨同尾翼，從而散發出一陣懾人嘅魅力呢！
車內前後兩排獨立四座位組合，空間寬敞闊落，後排座椅既可收摺放平，從而令尾廂空間倍增外，配合埋前排座椅，重可以演變成一張敞大嘅卧鋪㖭！而表板頂及車廂兩旁，設置有多個雜物匣外，前排乘客座椅坐墊下，重有一個大型儲物箱㗎！至於設備方面，除電窗、門邊電鏡及中央門鎖外，另外重有原廠冷氣同高級音響配搭，唔少得重有前後房燈及雙安全氣袋組合啦。
呢部MRWagon以一台660cc直3DOHCTurbo偈作骨幹，輸出不過不失，好啱用作日常代步之用；再者，輕盈轉向匹配嬌小嘅身軀，重好啱穿梭大街小巷嘅要求㗎！而一套4前速軚自動波轉檔直接順暢外，重給前排有左右Walk-through同闊落感㗎！