成功連任醫學會會長嘅勞永樂，近日表現風騷，噚日特登約埋八方等一班記者行家茶敍，大談未來大計之餘，忍唔住炮轟特首董建華偏心。
火頭源於老董一句：「發緊夢都掛住就業。」
勞永樂話，好擔心政府會出現政策傾斜，顧得失業嚟顧唔到公眾衞生問題。譬如話室內禁煙，政府之前一直好堅決要全面響食肆同室內場所禁煙，近排因為擔心會搞到有人失業，明顯轉軚。又例如監管私房菜，勞永樂話，私房菜都係食肆，一定要有足夠嘅衞生監管，唔可以因為經濟問題便「隻眼開隻眼閉」。
勞永樂咁勞氣，八方斷估佢對於經濟差等問題感受唔會太深，因為醫學會真係好有銀。
雖然現時經濟不景，但醫學會卻一口氣斥資八百萬，喺中環華商會大廈買咗個三千呎嘅單位做永久會址。其中五百萬由醫學界元老李樹培捐出，所以會址會以「香港醫學會李樹培醫生專業教育中心」命名。至於灣仔嘅舊址，唔會賣，而會用嚟開董事會。
醫生界真係要面對失業問題嘅係一班醫科畢業生，今年有三十個新畢業醫生失業。
勞永樂表示，短期內會為佢哋搵工，長期要求專科醫生培訓由六年延長至九年，等佢哋可以一畢業就做專科醫生。
傳真︰2623-9278
電郵︰